Սեպտեմբերի 12–13-ը Երևանի «Հաղթանակ» զբոսայգում տեղի ունեցավ «Future of the Past» («Անցյալի ապագան») միջազգային փառատոնը, որը 11 երկրների ստեղծագործողներին համախմբեց ավանդական մշակույթը էթնիկ նորաձևության, արվեստի և մշակութային երկխոսության միջոցով ժամանակակից ընկալման գաղափարի շուրջ։ Երևան էին ժամանել դիզայներներ և հավաքածուների հեղինակներ Բուլղարիայից, Միացյալ Թագավորությունից, Վրաստանից, Կատարից, Լիտվայից, Ռումինիայից, Սերբիայից, Հունգարիայից, Ուկրաինայից, Ուրուգվայից, ինչպես նաև ներկայացվել էին հայ դիզայներների հավաքածուները։
Փառատոնում Ուկրաինան ներկայացրեց դիզայներ Յուլիա Բուլգակովան, որը ներկայացրեց ուկրաինական մշակութային ժառանգությունից ոգեշնչված հեղինակային հավաքածուն։ Ցուցադրությունը փառատոնի միջազգային ծրագրի մասն էր, որի շրջանակում տարբեր երկրների դիզայներները ներկայացրեցին ազգային տարազների ժամանակակից մեկնաբանություններ՝ համադրելով ավանդույթը նորաձևության արդի միտումների հետ։
Փառատոնի բացման արարողությանը մասնակցեցին Հայաստանի Հանրապետությունում Ուկրաինայի գործերի ժամանակավոր հավատարմատար Վալերի Լոբաչը և Հայաստանի Հանրապետությունում Բուլղարիայի Հանրապետության արտակարգ և լիազոր դեսպան Նիկոլա Նիկոլովը։
Փառատոնի երկու օրերի ընթացքում գործում էր «Վարպետների քաղաքը», անցկացվում էին ստեղծագործական վարպետության դասեր և մշակութային միջոցառումներ, որոնք նպաստեցին տարբեր երկրներից ժամանած մասնակիցների միջև նոր մասնագիտական և բարեկամական կապերի հաստատմանը։
Հայաստանի Հանրապետությունում Ուկրաինայի դեսպանությունը ջերմորեն շնորհավորում է ուկրաինացի դիզայներ Յուլիա Բուլգակովային փառատոնին հաջող մասնակցության կապակցությամբ և շնորհակալություն է հայտնում կազմակերպիչներին՝ «Տերյան մշակութային կենտրոն» հասարակական կազմակերպությանը, Հայաստանի Հանրապետության կրթության, գիտության, մշակույթի և սպորտի նախարարությանը, ինչպես նաև միջոցառման բոլոր գործընկերներին՝ միջազգային մշակութային փոխանակման և ժամանակակից արվեստի միջոցով ազգային ավանդույթների հանրահռչակման համար հարթակ ստեղծելու կապակցությամբ։