Արևմտյան Ուկրաինայի ազգային համալսարանի Երևանի կրթագիտական ինստիտուտը (ԱՈՒԱՀ Երևանի կրթագիտական ինստիտուտը) միակ պետական բարձրագույն ուսումնական հաստատությունն է Ուկրաինայի սահմաններից դուրս, որը հիմնադրվել է Անդրկովկասում Ուկրաինայի և Հայաստանի Հանրապետության կրթության և գիտության նախարարությունների միջև կնքված համաձայնագրի հիման վրա։ Ինստիտուտը հիմնադրվել է 2001 թվականի հոկտեմբերի 20-ին, որպես Տերնոպոլի ժողովրդական տնտեսության ակադեմիայի Երևանյան մասնաճյուղ, որը հետագայում Ուկրաինայի կրթության և գիտության նախարարության և Արևմտյան Ուկրաինայի ազգային համալսարանի (ԵԿԳԻ) գիտական խորհրդի որոշմամբ վերանվանվել է Արևմտյան Ուկրաինայի ազգային համալսարանի Երևանի կրթագիտական ինստիտուտ։

Պատմություն և ղեկավարություն

Տերնոպոլի ժողովրդական տնտեսության ակադեմիայի (այժմ՝ Արևմտյան Ուկրաինայի ազգային համալսարան) գիտական խորհրդի 2001 թվականի ապրիլի 3-ի որոշմամբ ինստիտուտի տնօրեն է նշանակվել նույն բուհի շրջանավարտ, տնտեսագիտության թեկնածու, դոցենտ, համալսարանի պատվավոր պրոֆեսոր, Ուկրաինայի կրթության վաստակավոր գործիչ, Հայաստանի Հանրապետությունում Ուկրաինայի պատվավոր հյուպատոս Սահակ Մերուժանի Ղուդրատյանը։

Կարգավիճակ և հավատարմագրում 

Երևանի կրթագիտական ինստիտուտը Արևմտյան Ուկրաինայի ազգային համալսարանի կառուցվածքային ստորաբաժանումն է Երևանում: Ինստիտուտը լիցենզավորված է Հայաստանի Հանրապետության կրթության, գիտության, մշակույթի և սպորտի նախարարության և Ուկրաինայի կրթության և գիտության նախարարության կողմից 2001 թվականից, իսկ հավատարմագրված է Ուկրաինայի կրթության և գիտության նախարարության կողմից, ունի IV (բարձրագույն) կարգի հավատարմագիր:

Նվաճումներ

Իր գործունեության տարիների ընթացքում ինստիտուտը ճանաչում է ձեռք բերել Հայաստանի առաջատար բարձրագույն ուսումնական հաստատությունների շարքում: 2010թ. Շվեյցարիայի Ժնև քաղաքում տեղի ունեցած աշխարհի «Trade Leaders' Club» կազմակերպության կողմից 38-րդ մրցանակաբաշխության ժամանակ Արևմտյան Ուկրաինայի ազգային համալսարանի Երևանի կրթագիտական ինստիտուտին շնորհվել է «Նոր հազարամյակի միջազգային որակի նշան» հատուկ մրցանակ, իսկ ինստիտուտի տնօրեն Սահակ Մերուժանի Ղուդրատյանը՝ որպես հմուտ և պրոֆեսիոնալ ղեկավար, պարգևատրվել է ոսկե մեդալով: Պարգևատրման որոշումը կայացվել էր տվյալ կազմակերպության 112 երկրների 7000 անդամների կողմից: Այս և մյուս մրցանակներն ու պարգևատրումները փաստում են մեր ինստիտուտի կրթական բարձր որակի մասին:

Ինստիտուտը տվել է մոտ 2000 մասնագետ, որոնք պատասխանատու պաշտոններ են զբաղեցնում Հայաստանի և արտերկրի պետական և մասնավոր կազմակերպություններում: Շրջանավարտները ստանում են Ուկրաինայի պետական դիպլոմ, որը ճանաչվում է Հայաստանում և ամբողջ աշխարհում, համապատասխանում է եվրոպական չափանիշներին և բացում է տարբեր երկրներում աշխատանքի հնարավորություններ:

Կրթական ծրագրեր

ԱՈՒԱՀ Երևանի կրթագիտական ինստիտուտը առաջարկում է բարձրորակ ուսուցում պահանջված մասնագիտություններով՝ բակալավրի և մագիստրոսի կրթական ծրագրերով, առկա և հեռակա ուսուցմամբ.

Բակալավրիատ

• Ֆինանսներ, բանկային գործ, ապահովագրություն և ֆոնդային շուկա

• Հաշվապահական հաշվառում և հարկում

• Համակարգչային ինժեներիա

• Մենեջմենթ

• Զբոսաշրջություն

Մագիստրատուրա

• Հաշվապահական հաշվառում և հարկում

Գիտական և մշակութային գործունեություն

Ինստիտուտի դասախոսները բարձր որակավորում ունեցող մասնագետներ են, գիտական հոդվածների, դասագրքերի, ուսուցողական նյութերի և մենագրությունների հեղինակներ: Ամբիոնները կազմակերպում են միջազգային և ուսանողական գիտական կոնֆերանսներ, որոնց զեկույցները հրապարակվում են մասնագիտական ամսագրերում:

Ինստիտուտը ակտիվորեն նպաստում է Ուկրաինայի և Հայաստանի մշակույթների տարածմանը՝ անցկացնելով միջոցառումներ՝ նվիրված ականավոր գործիչներին (Տարաս Շևչենկո, Լեսյա Ուկրաինկա, Եղիշե Չարենց, Հովհաննես Թումանյան) և հիշարժան օրերին (Ուկրաինայի և Հայաստանի անկախության օր, Վիշիվանկայի օր, Ուկրաինական գրի և լեզվի օր, Հոլոդոմորի և Հայոց ցեղասպանության զոհերի հիշատակի օր):

Դերը հայ-ուկրաինական հարաբերություններում

ԱՈՒԱՀ ԵԿԳԻ-ը կարևոր դեր է խաղում հայ-ուկրաինական միջպետական հարաբերությունների ամրապնդման գործում կրթության և մշակույթի ոլորտում: Ինստիտուտը ուկրաինական մշակույթի կենտրոն է Հայաստանում, որը տալիս է եվրոպական չափանիշներին համապատասխան կրթություն, տարածում է Ուկրաինայի պատմությունը, լեզուն, գրականությունը և մասնագիտական կրթությունը: Այստեղ սովորում և դասավանդում են տարբեր ազգությունների ներկայացուցիչներ, ովքեր հպարտանում են իրենց ընդհանուր նվաճումներով:

Այսպիսով, ԱՈՒԱՀ-ի Երևանի կրթագիտական ինստիտուտը յուրահատուկ հարթակ է Ուկրաինայի և Հայաստանի միջև բարձրորակ կրթության և մշակութային երկխոսության զարգացման գործում՝ նպաստելով բարձրակարգ մասնագիտական կադրերի ձևավորմանը և երկկողմանի կապերի ամրապնդմանը։