Հոկտեմբերի 8-ին Ուկրաինայի դեսպանատանը տեղի է ունեցել Հայաստանի Հանրապետությունում Ուկրաինայի գործերի ժամանակավոր հավատարմատար Վալերի Լոբաչի աշխատանքային հանդիպումը՝ Օդեսայի մարզային մարտական գործողությունների մասնակիցների և զինծառայողների արհմիության նախագահ Մաքսիմ Շեպտիցկու և «Արմերիա» բարեգործական հիմնադրամի նախագահ Արմեն Սարգսյանի հետ։ Հանդիպումն անցկացվել է նրանց՝ ծառայողական հարցերով Հայաստանի Հանրապետություն կատարած այցի շրջանակներում։
Հանդիպման ընթացքում քննարկվել են Ուկրաինայի պաշտպանության ուժերին, ուկրաինացի վետերաններին և պատերազմից տուժած երեխաներին աջակցելու նպատակով համատեղ ջանքերի համակարգման մի շարք առանցքային հարցեր, մասնավորապես՝
Քննարկվել է ուկրաինական սփյուռքի ներկայացուցիչների և միջազգային գործընկերների ներգրավումը՝ Ուկրաինայի զինված ուժերի այն ստորաբաժանումների կարիքների համար դրամահավաքներ կազմակերպելու նպատակով, որոնց հոգ է տանում «Արմերիա» բարեգործական հիմնադրամը։
Նախանշվել են համագործակցության ուղղությունները մարտական գործողությունների մասնակիցներին բժշկական, հոգեբանական և սոցիալական օգնություն տրամադրելու, ինչպես նաև նրանց ընտանիքներին աջակցելու ոլորտներում։
Դիտարկվել են հիմնադրամի հովանու ներքո միջազգային մանկապատանեկան մարզական միջոցառումներ կազմակերպելու նախաձեռնությունները, որոնք նպաստում են հայրենասիրական դաստիարակությանը և պատերազմից տուժած երեխաների ինտեգրմանը, ինչպես նաև ամառային արձակուրդների ընթացքում երեխաների՝ Հայաստանի Հանրապետություն առողջարանային և հանգստի նպատակով այցեր կազմակերպելու հնարավորությունը:
Կամավորական և վետերանների շարժումների ներկայացուցիչները միացել են Ուկրաինայի դեսպանատան մարդասիրական դրամահավաք նախաձեռնությանը՝ Ուկրաինայի համայնքներին մարդասիրական օգնություն տրամադրելու նպատակով։ Նախաձեռնությունն իրականացվում է Հայկական Կարմիր խաչի ընկերության հետ համագործակցությամբ և ուղղված է Ուկրաինայում շարունակվող հումանիտար իրավիճակի հետևանքով տուժած մարդկանց աջակցությանը։
Ուկրաինայի դեսպանատունը շնորհակալություն է հայտնել ուկրաինացի կամավորներին և հասարակական առաջնորդներին՝ երկրի պաշտպանունակության ամրապնդման գործում իրենց շարունակական ներդրման համար, ինչպես նաև պատրաստակամություն հայտնել ցուցաբերելու համակողմանի տեղեկատվական և կազմակերպչական աջակցություն նմանատիպ նախաձեռնություններին։