2026 թվականի հունիսի 28-ին Ուկրաինան նշում է Ուկրաինայի Սահմանադրության ընդունման 30-ամյակը։ Սահմանադրությունը պետության Հիմնական օրենքն է, որը ամրագրել է երկրի հասարակական և պետական կարգի հիմնարար սկզբունքները, մարդու և քաղաքացու իրավունքների ու ազատությունների երաշխիքները, ինչպես նաև սահմանել է անկախ Ուկրաինայի զարգացման ռազմավարական ուղղությունները։

1996 թվականի հունիսի 28-ին Սահմանադրության ընդունումը դարձավ ուկրաինական պետականաշինության կարևորագույն փուլերից մեկը և նշանակալի հանգրվան՝ երկրի ինքնիշխանության, ժողովրդավարության և իրավունքի գերակայության ամրապնդման գործում։

Սահմանադրության ընդունմանը նախորդել է երկարատև և բարդ սահմանադրական գործընթաց, որն ուղեկցել է անկախ ուկրաինական պետության կայացմանը։ Այդ գործընթացի սկիզբը դրվել է 1990 թվականի հուլիսի 16-ին Ուկրաինայի պետական ինքնիշխանության մասին Հռչակագրի ընդունմամբ, իսկ 1991 թվականի օգոստոսի 24-ին Ուկրաինայի անկախության ակտի հռչակումը ստեղծեց նոր Հիմնական օրենքի մշակման քաղաքական նախադրյալները։

Երեք տասնամյակների ընթացքում Ուկրաինայի Սահմանադրությունը շարունակում է մնալ ժողովրդավարական պետության գործունեության իրավական հիմքը՝ ամրապնդելով իրավունքի գերակայության, իշխանությունների տարանջատման սկզբունքները և երաշխավորելով մարդու իրավունքներն ու ազատությունները։ Ռուսաստանի լայնածավալ ագրեսիայի պայմաններում Սահմանադրությունը շարունակում է վճռորոշ դեր ունենալ պետական ինստիտուտների կայունության ապահովման և ուկրաինացի ժողովրդի ժողովրդավարական ընտրության պաշտպանության գործում։