Նոյեմբերի 28-ին Երևանի Տարաս Գրիգորևիչ Շևչենկոյի անվան 42-րդ ավագ դպրոցում տեղի ունեցավ ավանդական և պայծառ տոն՝ «Աշնան մեղեդի»։ Դպրոցի միջանցքներն ու դահլիճը հմտորեն զարդարվել էին աշակերտների կողմից և վերածվել գունագեղ երևանյան փողոցների, որոնք ճառագայթում էին լույս, ջերմություն և ոսկեգույն աշնան բույր։
Այս միջոցառումը Հայաստանի երիտասարդների մշակութային ավանդույթների և ստեղծագործական տաղանդների հրաշալի ցուցադրություն էր։
Դպրոցի ղեկավարության հրավերով միջոցառմանը այցելեց ՀՀ-ում Ուկրաինայի գործերի ժամանակավոր հավատարմատար Վալերի Լոբաչը։
Իր ողջույնի խոսքում նա խորը երախտագիտությամբ դիմեց ներկաներին՝ ընդգծելով այս կրթական հաստատության երիտասարդների տաղանդը, ստեղծագործականությունը և ներառականությունը։
Գործերի ժամանակավոր հավատարմատարը հատուկ ուշադրություն դարձրեց ուսուցչական կազմի և դպրոցի ղեկավարության դերին.
«Օգտվելով այս առիթից՝ ուզում եմ հատուկ շնորհակալություն հայտնել ձեզ, սիրելի՛ ուսուցիչներ, ձեր տիտանական աշխատանքի համար՝ ձեր անսպառ համբերության, ձեր ազնիվ գործի նկատմամբ խորը կրքի և գիտելիքների ճանապարհին երիտասարդ սերնդին անսասան աջակցության համար։
Հատուկ շնորհակալություն, սիրելի՛ տնօրեն, ձեր իմաստուն ղեկավարության, հաստատության աշխատանքների արդյունավետ կազմակերպման և յուրաքանչյուր աշակերտի զարգացմանն ուղղված անխոնջ աշխատանքի համար»։
Միջոցառումն անցավ ջերմ և ոգեշնչող մթնոլորտում՝ ընդգծելով ուկրաինական մշակութային ինքնության և լեզվի պահպանման կարևորությունը արտերկրում։ Ուկրաինայի դեսպանատունը Հայաստանի Հանրապետությունում կշարունակի աջակցել երիտասարդության կրթական և մշակութային նախաձեռնություններին, որոնք նպաստում են ուկրաինա-հայ մշակութային, մարդասիրական և միջանձնային կապերի ամրապնդմանը։