Ուկրաինայի դեմ ՌԴ-ի լայնամասշտաբ ագրեսիայի մեկնարկի երրորդ տարեդարձին ԵՄ-Հայաստան խորհրդարանական գործընկերության պատվիրակությունների և Հայաստանի Հանրապետությունում հավատարմագրված ԵՄ երկրների դիվանագիտական առաքելությունների դեսպանների մասնակցությամբ Հայաստանում ԵՄ ներկայացուցչության տարածքում տեղի ունեցավ Ուկրաինայի և ԵՄ դրոշների բարձրացման հանդիսավոր արարողություն:
Հայաստանի Հանրապետությունում Ուկրաինայի գործերի ժամանակավոր հավատարմատար Վալերի Լոբաչն իր խորին երախտագիտությունն է հայտնել ԵՄ բոլոր ներկա գտնվող ներկայացուցիչներին: Նա նշել է Ուկրաինայի համար այս բարդ ժամանակաշրջանում Եվրոպայի աջակցության և օգնության կարևորությունը։ Ընդգծվել է նաև, որ եվրաինտեգրման գործընթացներն այլընտրանք չունեն Ուկրաինայի համար՝ հաստատելով միասնությունն ու համերաշխությունը ուկրաինացի ժողովրդի հետ:
Իր ելույթի ժամանակ Վ.Լոբաչը նշել է, որ Մոսկվայի ագրեսիային արդյունավետ դիմակայելու համար անհրաժեշտ է միասնական արտաքին քաղաքականություն, համակարգված դիվանագիտություն և միացյալ Եվրոպայի համախմբված դիրքորոշում:
Եզրափակելով խոսքը՝ նա ընդգծել է, որ ընդհանուր նպատակը, որն այսօր միավորում է բոլորին, ուժեղ, անվտանգ և խաղաղ Եվրոպան է, իսկ Ուկրաինան նրա անքակտելի գրավականն է: