Ամեն տարի հուլիսի 15-ին Ուկրաինան նշում է Ուկրաինական պետականության օրը։ Տոնը սահմանվել է Ուկրաինայի նախագահի՝ 2021 թվականի օգոստոսի 24-ի հրամանագրով՝ նպատակ ունենալով ամրապնդել ուկրաինական պետականության ավելի քան հազարամյա ավանդույթների գիտակցումը։

Պատմական շարունակականություն

Ուկրաինական պետականության պատմությունը սկիզբ է առնում միջնադարյան Ռուսի պետությունից, որի կենտրոնը Կիևն էր։ Հենց Ռուսն է դրել ուկրաինական պետական ավանդույթների հիմքերը՝ պետական խորհրդանիշները, դրամական միավորը և Կիևի դերը որպես քաղաքական ու մշակութային կենտրոն։

Ուկրաինայի քաղաքակրթական ընտրությունը դարձավ 988 թվականին իշխան Վլադիմիր Մեծի կողմից քրիստոնեության ընդունումը։ Այդ որոշումը բացեց ճանապարհը դեպի եվրոպական քաղաքակրթական տարածք՝ նպաստելով գրի, կրթության և մշակույթի զարգացմանը։

Ռուսի պետական ավանդույթները շարունակեցին զարգացնել՝

Ռուսական թագավորությունը (Դանիլո Գալիցկու օրոք),

Ուկրաինական կազակական պետությունը՝ Զապորոժյան զորքը,

Ուկրաինական Ժողովրդական Հանրապետությունը և Արևմտաուկրաինական Ժողովրդական Հանրապետությունը,

Հեթման Պավլո Սկորոպադսկու Ուկրաինական պետությունը,

Կարպատյան Ուկրաինան,

ժամանակակից անկախ Ուկրաինան։

Մեր ժառանգությունը. խորհրդանիշներ և արժեքներ

Ուկրաինական պետականությունն անքակտելիորեն կապված է իր դարավոր պատմություն ունեցող խորհրդանիշների հետ։

Եռաժանին (Տրիզուբ)՝ Ռուսի իշխանների հնագույն նշանն է, որը խորհրդանշում է ուկրաինական պետական իշխանության ժառանգականությունը։ 1918 թվականին այն պաշտոնապես հաստատվեց որպես Ուկրաինական Ժողովրդական Հանրապետության պետական զինանշան, իսկ 1992 թվականից դարձավ Ուկրաինայի փոքր պետական զինանշանը։

Կապույտ-դեղին գույները՝ պետական դրոշի ակունքները հասնում են Ռուսական թագավորության ժամանակներին։ Որպես Ուկրաինայի պետական դրոշ այն վերջնականապես հաստատվեց 1918 թվականին, իսկ 1991 թվականի սեպտեմբերի 4-ին հանդիսավոր կերպով բարձրացվեց Գերագույն ռադայի շենքի վրա։

Գրիվնան՝ պատմական դրամական միավոր է, որը 1996 թվականին կրկին շրջանառության մեջ մտավ որպես անկախ Ուկրաինայի պաշտոնական արժույթ՝ դառնալով երկրի ինքնիշխանության տնտեսական խորհրդանիշը։

Ուկրաինան այսօր

Այսօր մենք հիշում ենք բոլոր նրանց, ովքեր դարերի ընթացքում պայքարել են Ուկրաինայի անկախության համար։ Ուկրաինական պետականության օրը պատասխան է թշնամու՝ պատմական փաստերը խեղաթյուրելու փորձերին։ Մենք պաշտպանում ենք ոչ միայն մեր ապագան, այլև մեր անցյալը, ազգային ինքնությունը և ինքնորոշման իրավունքը։

Պետությունը ազգի ամբողջական գոյությունն ապահովելու ձևն է։ Ուկրաինական պետականության պատմությունը հզոր ուժ է, որը միավորում է ուկրաինացիների սերունդներին՝ հանուն ազատության և ժողովրդավարական ապագայի պայքարում։

Աղբյուր․ Ուկրաինական պետականության օրվան նվիրված տեղեկատվական նյութեր, Ուկրաինայի ազգային հիշողության ինստիտուտ։ Інформаційні матеріали до Дня Української Державності Українського інституту національної пам’яті.